Псалом 90
Хвалá пѣ́сни Дави́довы, не надпи́санъ у Еврéй.

01 Живы́й въ пóмощи вы́шняго, въ крóвѣ Бóга небéснаго водвори́т­ся,
02 речéтъ Гóсподеви: застýпникъ мóй еси́ и при­­бѣ́жище моé, Бóгъ мóй, и уповáю на негó.
03 Я́ко тóй избáвитъ тя́ от­ сѣ́ти лóвчи и от­ словесé мятéжна:
04 плещмá сво­и́ма осѣни́тъ тя́, и подъ крилѣ́ егó надѣ́ешися: орýжiемъ обы́детъ тя́ и́стина егó.
05 Не убо­и́шися от­ стрáха нощнáго, от­ стрѣлы́ летя́щiя во дни́,
06 от­ вéщи во тмѣ́ преходя́щiя, от­ сря́ща {от­ нападéнiя} и бѣ́са полýден­наго.
07 Падéтъ от­ страны́ тво­ея́ ты́сяща, и тмá одеснýю тебé, къ тебѣ́ же не при­­бли́жит­ся:
08 обáче очи́ма тво­и́ма смóтриши и воз­дая́нiе грѣ́шниковъ ýзриши.
09 Я́ко ты́, Гóсподи, уповáнiе моé: вы́шняго положи́лъ еси́ при­­бѣ́жище твоé.
10 Не прiи́детъ къ тебѣ́ злó, и рáна не при­­бли́жит­ся тѣлеси́ тво­емý {селéнiю тво­емý}:
11 я́ко áнгеломъ сво­и́мъ заповѣ́сть о тебѣ́, сохрани́ти тя́ во всѣ́хъ путéхъ тво­и́хъ.
12 На рукáхъ вóзмутъ тя́, да не когдá преткнéши о кáмень нóгу твою́:
13 на áспида и васили́ска настýпиши, и поперéши львá и змíя.
14 «Я́ко на мя́ уповá, и избáвлю и́: покры́ю и́, я́ко познá и́мя Моé.
15 Воззовéтъ ко Мнѣ́, и услы́шу егó: съ ни́мъ éсмь въ скóрби, измý егó и прослáвлю егó:
16 долготóю днíй испóлню егó и явлю́ емý спасéнiе Моé».

Молитва Честному Кресту

Да воскре́снет Бог, и разы́дутся врази́ Его́, и да бежа́т от лица Его ненави́дящии Его, яко исчеза́ет дым, да исче́знут, яко тает воск от лица огня, тако да погибнут беси от лица любящих Бога и знамена́ющихся крестным знаме́нием, и да возвесели́мся реку́ще: радуйся, Кре́сте Госпо́день, прогоня́я бе́сы си́лою на Тебе́ пропя́таго Го́спода нашего Ису́са Христа́, во ад сше́дшаго, и попра́вшаго силу диаволю, и да́вшаго нам Крест Свой Честны́и на прогна́ние вся́каго супоста́та. О, Пречестны́и и Животворя́щии Кре́сте Госпо́день, помога́й ми, с Пресвято́ю Госпожею Богоро́дицею и со всеми святы́ми небе́сными си́лами, всегда и ныне и присно и во веки вéком, аминь.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки ве́ком, ами́нь.

Го́споди, поми́луй.
Трижды

Господи, благослови!

Господи Исусе Христе, Сыне и Слове Божий, молитв ради Пречистыя Твоя Матери и всех святых, помилуй нас и мир Твой, аминь